ՊԱՏՄՈՒԹՅՈՒՆ

ՀՀ կառավարության 1994թ. հունիսի 24-ի թիվ 279 որոշմամբ, ապա ՀՀ պաշտպանության նախարարի հունիսի 25-ի հրամանով կազմավորվեց ՀՀ ՊՆ բարձրագույն զինվորական բազմաբնույթ հրամանատարական ուսումնարանը («ԲԶԲՀՈւ»): Ուսումնարանի առաջին պետ նշանակվեց գեներալ-մայոր Սերգեյ Սահակի Մարտիրոսյանը: Հետագա տարիներին այդ պաշտոնը զբաղեցրել են գնդապետ Ալեքսանդր Գրիգորի Մինասյանը, գեներալ-մայոր Աշոտ Սեդրակի Պետրոսյանը, գեներալ-լեյտենանտ Արշալույս Զավենի Փայտյանը, գեներալ-լեյտենանտ Ստեփան Վահանի Միրզոյանը, գեներալ-լեյտենանտ Գարեգին Աշոտի Գաբրիելյանը: Այժմ Ռազմական ինստիտուտի պետն է գեներալ-մայոր Մարտին Նազարի Կարապետյանը:

1994թ. սեպտեմբերի 1-ին ուսումնարանն առաջին անգամ իր դռները բացեց կուրսանտների առաջ: ՀՀ պաշտպանության նախարարի 1994թ. նոյեմբերի 1-ի հրամանով ԵՊՀ զինվորական ամբիոնն ամբողջովին հանձնվեց ԲԶԲՀ ուսումնարանին:

Նորաստեղծ բանակի խնդիրներից ելնելով` ուսումնարանը սկզբնական շրջանում զինվորական մասնագետներ էր պատրաստում 8 մասնագիտությունների գծով: Միաժամանակ ուսումնարանի բազայի վրա անցկացվում էին մեկամյա դասընթացներ, որտեղ ընդունվում էին ՀՀ բուհերն ավարտած երիտասարդներ:

ՀՀ կառավարության` 1998թ. հունվարի 16-ի թիվ 24 որշմամբ ՀՀ ՊՆ բարձրագույն զինվորական բազմաբնույթ զինվորական ուսումնարանը վերակազմավորվեց Ռազմական ինստիտուտի: Նույն թվականին էլ Ռազմական ինստիտուտը տվեց իր առաջին շրջանավարտները:
ՀՀ Նախագահի հրամանագրով և ՀՀ պաշտպանության նախարարի 2000թ. փետրվարի 8-ի հրամանով ՀՀ ռազմական ինստիտուտը վերանվանվեց Վազգեն Սարգսյանի անունով:

ՀՀ նախագահի` 2000թ. փետրվարի 12 վկայագրով ինստիտուտին հանձնվեց մարտական դրոշ` որպես զինվորական պատվի, փառքի և արիության խորհրդանիշ:

2004թ. հունվարի 27-ից սկսեց գործել սպայական կադրերի որակավորման բարձրացման կենտրոնը («ՍԿՈԲԿ»):

2005թ. սեպտեմբերի 1-ին բացվեց նոր ուսումնական մասնաշենքը:

2003թ. սկսած, ինտեգրվելով ՀՀ պետական բուհերի համակարգում, Ռազմական ինստիտուտը դարձավ հանրապետության պետական բուհերի խորհրդի լիիրավ անդամ:

ԻՆՍՏԻՏՈՒՏԻ  ՊԵՏ

ՄԱՐՏԻՆ ՆԱԶԱՐԻ ԿԱՐԱՊԵՏՅԱՆ
գեներալ-լեյտենանտ

Ծնվել է 1960 թ. մարտի 18-ին Ղուկասյանի շրջանի Փոքր Սեպասար գյուղում:

1981 թ. ավարտել է Թբիլիսիի բարձրագույն հրետանային հրամանատարական ուսումնարանը: 1977-1992թթ.-ին ծառայել է ԽՍՀՄ զինված ուժերում. եղել է դասակի, մարտկոցի, դիվիզիոնի հրամանատար: 1992թ.-ին ծառայության է անցել ՀՀ զինված ուժերում և նշանակվել է Ամասիայի շրջանի զինվորական կոմիսար: 1994-1997թթ. սովորել է Սանկտ-Պետերբուրգի Միխայլովի անվան  ռազմահրետանային համալսարանում: 

1997-2000թթ.-ին եղել է 4-րդ բանակային կորպուսի հրամանատարի տեղակալ - շտաբի պետ, 2000-2003 թթ.-ին` նույն բանակային կորպուսի  հրամանատար, 2003-2008թթ.-ին` ՀՀ ԶՈւ գլխավոր շտաբի հրթիռային զորքերի և հրետանու վարչության պետ: 2008թ.-ի հուլիսի 15-ին նշանակվել է ՀՀ ՊՆ Վ. Սարգսյանի անվան ռազմական ինստիտուտի պետ:

2011թ. - ՀՀ Նախագահի սեպտեմբերի 3-ի հրամանագրով շնորհվել է «գեներալ-լեյտենանտ» զինվորական կոչում:

1992-1994թթ.-ին մասնակցել է Իջևանի պաշտպանությանը, Քաշաթաղի, Քարվաճառի ազատագրման մարտերին: Պարգևատրվել է ՀՀ «Մարտական խաչ» 2-րդ աստիճանի շքանշանով, «Արիության», «Հայրենիքի մատուցած ծառայության» 2-րդ աստիճանի, «Մարշալ Բաղրամյան», «Դրաստամատ Կանայան» մեդալներով:

Ամուսնացած է, ունի դուստր և որդի:

Ուսումնական գործընթաց

ՀՀ պաշտպանության նախարարի 2001թ. մայիսի 29-ի հրամանով Ռազմական ինստիտուտն անցել է երկու` մոտոհրաձգային և հրետանային մասնագիտություններով սպայական կադրերի պատրաստմանը: 

Մոտոհրաձգային մասնագիտության շրջանակներում 4-րդ կուրսում 2007-2008թթ. պատրաստվել են նաև տանկիստներ, իսկ 2008-2009 ուսումնական տարվանից` հետախույզներ և սակրավորներ:

Այսօր Ռազմական ինստիտուտում գործում է երկու ֆակուլտետ` համազորային` 4 ամբիոնով, և հրետանային` 3 ամբիոնով, ինչպես նաև 3 առանձին ամբիոն:

Համազորային ֆակուլտետը պատրաստում է մոտոհրաձգային, տանկային, հետախուզական, ինժեներասակրավորային դասակների հրամանատարներ, զինվորական թրթուրավոր ու անվավոր ռազմական մեքենաների ճարտարագետներ` բակալավրի աստիճանին համապատասխան քաղաքացիական մասնագիտությամբ: Ուսման տևողությունը 4 տարի է:

Հրետանային ֆակուլտետը պատրաստում է հրետանային դասակի հրամանատարներ, զինվորական և անվավոր ռազմական մեքենաների ճարտարագետներ` բակալավրի աստիճանին համապատասխան քաղաքացիական մասնագիտությամբ: Ուսման տևողությունը 4 տարի է: 

Ուսման ընթացքում կուրսանտների գիտելիքները ստուգվում են կիսամյակային և տարեկան ստուգարքների ու քննությունների միջոցով: Ավարտական քննությունները ընդունվում են պետական քննական հանձնաժողովի կողմից հուլիսի ընթացքում: Քննությունները հաջող հանձնելու դեպքում կուրսանտները ստանում են առաջին սպայական կոչում` «լեյտենանտ», և համապատասխան մասնագիտական որակավորում, որից հետո վիճակահանությամբ ծառայության են նշանակվում ՀՀ զինված ուժերում:

Ռազմական ինստիտուտում գործում են նաև սպայական մեկամյա դասընթացներ, որտեղ ընդգրկված են ժամկետային պարտադիր զինվորական ծառայության ենթակա բարձրագույն կրթությամբ զորակոչիկները:

Ռազմական ինստիտուտում ուսուցումը հայերեն է: Ուսումնական պարապմունքների համար ստեղծված է համապատասխան ուսումնական և նյութատեխնիկական բազա: Յուրաքանչյուր ուսումնական դասակ ունի իրեն ամրագրված լսարան: Ֆակուլտետներում և ամբիոններում` հրետանու, մարտավարության, կրակային պատրաստության, կապի, ՀՕՊ, զրահատանկային տեխնիկայի, ինժեներային պատրաստության, գործում են հատուկ մասնագիտացված լսարաններ: Գործում են նաև օտար լեզուների ժամանակակից լսարաններ, որտեղ կուրսանտներն ուսանում են անգլերեն, գերմաներեն, հունարեն, պարսկերեն և այլ լեզուներ: 

Ռազմական ինստիտուտում գործում են մեքենաների նյութական մասի և ճանապարհային երթևեկության կանոնների ուսուցման լսարաններ, մարտական և տրանսպորտային մեքենաների հավաքակայան, ավտոդրոմ և զրահավարժարան: Ուսումնական գործընթացի եզրափակիչ փուլը կուրսանտներն անցնում են «Բաղրամյան» ուսումնական կենտրոնում` ճամբարային ելքերի ժամանակ:

Ուսման ընթացքում Ռազմական ինստիտուտի կուրսանտներն ապահովվում են սննդով, հանդերձանքով, կացարաններով, ստանում են կրթաթոշակ: Գերազանց առաջադիմությամբ սովորող և զինվորական բարձր կարգապահություն ունեցող կուրսանտները ՀՀ պաշտպանության նախարարի հրամանով ստանում են անվանական պարգևավճարներ:

Ռազմական ինստիտուտը ունի նաև բուժկետ, ակումբ և գրադարան:

Ռազմական ինստիտուտն իր մասնակցությունն է ունենում համապետական և համաբանակային միջոցառումներին, համագործակցում է արտերկրի մի շարք ռազմական ուսումնական հաստատությունների և ՀՀ պետական բուհերի հետ:
ՆԱՏՕ-ի` «Գործընկերություն հանուն խաղաղության» ծրագրի շրջանակնե¬րում Ռազմական ինստիտուտում 2003 թվականին և 2008 թվականին կազմակերպվեցին «Համատեղ լավագույն ջանք» ու «Համատեղ աղեղ և համատեղ նիզակակիր» զորավարժությունները:

Տարբեր ժամանակներում Ռազմական ինստիտուտն իր հյուրընկալ դռներն է բացել Հունաստանի, Չինաստանի, Իրանի, Լիտվայի, Բելառուսի, Գերմանիայի, Ուկրաինայի, ԱՄՆ-ի, Ռուսաստանի, Ռումինիայի և ՆԱՏՕ-ի ռազմական պատվիրակությունների առաջ. այդ համագործակցությունն օգնում է կատարելագործելու ՀՀ ռազմական կրթական համակարգը:

Ընդունելության կարգը